قصيدة( بعدين معك يا وطن ) بقلم الشاعر: حسام القاضي
( بعدين معك يا وطن ) ؟
مش لازم تظل تشوفنا بالشقاء بنتغمس فيه صباح ومساء وعنوانا تايه بلا انتهاء ولا ابتداء ( لترضى )
مش لازم تقبل النا مرمطة وحيرة وهوان وملل وزهق وقرف وندم وهرهطة ( لترضى )
ومش لازم كمان تطردنا من بقاعك وتجبرنا نتغرب وتطلب منا نعمر بساطك ( لترضى )
مش لازم تصير مطية وترهن مصيرك بقرار لحفنة وتسكت وتقول حكم القوي باقي ( وترضى )
مش لازم تقبل تشوف الترف والفجور والتحكم بمصائر الأمور وتغض الطرف عن عثرات لأناس ما عندهم ألف يحكو فيها ولا ياء يتنعمو فيها ( وترضى )
الواااااااسطة بترابك حلل والمحسوبية ع ثراك بالهبل ناس بتسوى وناس ما بتسوى قشرة بصل ( وبترضى )
( وبعدين معك يا وطن ) ؟
متعودين ع حَرَّك بس إنت ما بتبطل نفخ بطحنا جبلك وساويناه بسهلك بس شموخك بالعلااااالي وبتجخ وما ( بترضى )
أحرجت الشباب برجولتهم وشككت البنات بأصالتهن والكل بتراكض ليرضيك بس أنت أبدا ما ( بترضى )
ليش عندي وطن مُستقِل وغيري وطنو مُحتل هاد بوطنو مرفه وهاد بوطنو مسفَّه وكلو بشرب من كاسك يا وطن بس ( ترضى )
ليش لأتغرب وأصير غريب وعن أهلي أصير بعيد لا طايل أخ أشوفه ولا قريب مسموحلي أبوسه ( لترضى )
ياما تغنيت باسمك وافتخرت بعلمك وحفظت موشحات بتزمجر بمجدك وانت ما ( بترضى )
يا عالم نطال شوفة ترابك ونندفن بجورة فيها ريحة جدادنا ببساطك ولا القدر حيكون قاسي ونتفلفل بحسرة بُعدك وفقدانك ( وحترضى )
بحكي ليش بعلقونا فيك وليش بصحونا ع أغاني حبك لنموت فيك وبتحكم علينا نفارق سوارك ونترك ارواحنا مهدورة بثرى وديانك ( وترضى )
ما ححط فواصل هون ولا تنقيط ولا نهايات لَجُمَل وما حَكثِّر تشكيل وحنشر المقال وما في بهالدنيا مستحيل ( بترضى أو ما بترضى )
بعدين معك يا وطن .. بعدين معك يا وطن ..
بعدين معك ياااااااااااااااااااااااااااااااااااااااااااااا
( وطن )
بقلم : حسام القاضي
تعليقات
إرسال تعليق