قصيدة & كان قلبي طير & بقلم الشاعر : متولي محمد متولي
( كان قلبي طير )
*****
كان عندي طير
دايما يحلق في الفضا
طول النهار والليل
ما يزهقش ِ!
وكنت انادي عليه
ما يسمعش ِ!
يفضى الفضا حواليه
و هو فارد فيه
جناحاته
ما يتعبشِ
أبيض بلون السحاب
تقولش قلب ملاك
طاهر
ما أذنبش ِ!
تقولش توب الشهيد
من نور
ما يبهتش ِ!
..........
في يوم لمحته
بيغازل الداير !
و اللهفة جوه عنيه
كأنها ضفاير !
على حر عض الجوع
والبرد ..
ما قدرش ِ!
والجوع شيطااااااااااااان
كافر..
ما يرحمشِ !
حاول عليه يصبر
لكنه ..
ما صبرشِ
قام حط ع الداير
ورجع إليه ..
برجليه !
يقف عليه و يمشي !
و يمد منقاره ياكل
ما يشبعش ِ
و يبات في حضني
وهو ..
فاطر ..
ومتغدي ..
ومتعشي !
...........
من كتر حبي فيه
قصقصت له جناحه !
لآجل انه ما يطرش ِ
عني ..
ما يبعدشِ !
ويوماتي اطل عليه
و أكله بإيدي
و بإيدي برضه اسقيه
عشان ما يحزنشِ
وبنيت له أجمل عش
فوق نصبة الداير
وكأني بابني في عشي !
..........
كان نفسي يبقى
سعيد ..
فرحان ..
و متهني ..
لكنه ما فرحشِ !
ويوم ورا التاني
أشوفه في النازل
مهموم ..
ما يضحكشِ
و عنيه على العصافير
و هي بتحوم فوق
ما تنزلشِ
و كنت اشوفه
سهران ..
ما بينامشِ
والحزن مالي عنيه
عشان ما بيطرش
................
و ف يوم
حسيت كأن الليل
على غير عوايده
طال ..
والنهار غطسان
و لا طلعش !
والشمس مكسوفة
وملفوفة ..
في شال أسود
ما بتبانش !
طلعت أجري عليه
وكل شيء حوالي َ
ما يطمنش !
لقيته ..
و الروح مفارقة عنيه
وهو شبعان موت
ما بتحركش
كان فوق
في سابع سما
ملك
السحاب له عرش
أصبح في سابع أرض
والعش صار له نعش !
يا طيري انا المسجون
ده كفني..
و ده نعشي
قلبي كما المجنون
سافر ..
و لا رجعش
لفيت وراك الكون
ما لي حبيب غيرك
مكتوب على جبيني
اسمك يا نور عيني
كحَّلت به رمشي !
تأليف / متولي محمد متولي
دمياط
22 / 6 / 2020 م
تعليقات
إرسال تعليق