قصيدة & هروب & بقلم الشاعر : ابراهيم رمضان
هروب
إبراهيم خليفه رمضان
*****
هروب
ولأمته أهرب من نفسي
وادور علي شيء
يشبه احلامي البكر
وادور حوالين نفسي
اكتر م اللازم
زي قادوس بيلف في ساقية
يزقي الزرع / الارض العطشانه
وهو محروم من بلة ريق
لكنه بيدور وبيلف
ويدوخ
والدوخه بتعمل من .. شروخ
واكمنه بيدور ويلف
تيجي الميه وف الحال
الجوف بيجف
وكن الميه عليه بزف :
احرينك يا قدوس
يا مشعلق نفسك ف الساقيه
تقدر تبعد وتقول :
أنا مالي ومال الزرع
ان شالله الزرع يموت
وليه الساقيه تطلع بيه .. وتنزل ؟!!
بين الحيا والموت
مش راح تقدر تنطق
وقبل ما تنطق
راح تستنقط ميه
تزقي الزرع / الارض العطشانه
متحسش غير بالريق النشفان
وكأنك في السجن
ومنتظر حكم الاعدام
تعليقات
إرسال تعليق