---- يابخت اللي يفوز بيها ----
دي حتة بنت ياأمايه
ماليها زي في الجيها
ولا في شيرا ولافي غمرة
ولافي جيزة وضواحيها
جذورها وأصلها قبلي
بصعيد أسوان أراضيها
ولو في جمالها انا هوصف
ما 1000 قصيده تكفيها
سمار أصلي وعيون عسلي
بدوب وبموت انا فيها
بعوم وبغوص في دنيتهم
واقب بشط مراسيها
وشعر كأنه ليل وطويل
تداعبه نسمه ترضيها
يروح لبعيد ياخدني معاه
وانا عاشق لياليها
ولو هوصف شفايفها
تبارك ربي ناشيها
كما العنقود بأوصافه
ورسمه وهيئته ليها
وفص عويس شفايقها
يابخت اللي يفوز بيها
وخفة دم مالهاش زي
تقول شجرة بترويها
بعسل النحل أو سكر
ودي الثمرة بتهديها
خفيفة الظل ومين هيمل
من الجنة وحوريها
بتسكر م البشر ألوفات
بحرف وكلمة ترميها
وانا سكران حزين ولهان
ياريتني ماجيت نواحيها
ياريتني مت من بدري
وخدت القوم تعازيها
بجد حزين عذابي مهين
ومين للروح يداويها
مانيش قادر أداري الشوق
ولا قادر أبوح ليها
ولا قادر أغور وأمشي
ولا أبقي العمر جنبيها
ياناس دلوني أعمل أيه
ومين للنار يطفيها
يارب الموت يريحني
ويسعدها ويهنيها
-
-
بقلم - ياسر فؤاد - الثلاثاء - 17-3-2020
تعليقات
إرسال تعليق