وانت ماشى ف الشوارع
اوعى تنسى تجيب كباب
لأجل ماتفطر ولادك
وامهم زينة الشباب
وانت ماشي مين يهمك
اللي قاعد ع التراب
هو وأخواته الغلابة
ممعاهوش يشرب هباب
وللا يفطر زى غيره
ميسويش حتى الكلاب
مرة ياكل م الزبالة
ألف مرة يدوق عذاب
نفسه يشرب يوم سيجارة
نفسه يدفع يوم حساب
لو يبطل شم كلة
عقله مش هتشوفه غاب
ف الشوارع طفل تايه
زي ملح ف مية داب
واحنا مش عارفين نلمه
طول حياته ف الضباب
بس مين هو الضحية
لو شباب القلب شاب
لو نغمض عن ولادنا
لو زمام العدل ساب
الرزيلة تمد ايدها
والتسيب والخراب
والتشرد والتمرد
والجريمة ف كل باب
ارحموهم واسمعوهم
طلعوهم م السراب
والاهالى تخللى بالها
من عيالها و م الصحاب
واللى عايشين ف العلالي
يكسبوا فيهم ثواب
سعيد حسان ...أولاد الشوارع
تعليقات
إرسال تعليق